Umdlali oyibamba esiswini uSipho Mbule uthi uzokwenza konke okusemandleni ukuzama ukuqinisekisa ukuthi ngeke esaphuma esikwatini seBafana Bafana ngemuva kokubizwa ukuze ezovala isikhala sikaTito Maswanganyi.
UMbule ubeke kanje ngoLwesibili ntambama ngemuva kwesimemezelo seSAFA nokubonakala kwakhe ekhempini yeBafana.
Lo mdlali sesiside isikhathi agcina ukubizwa kwiBafana njengoba agcina ukuba yingxenye yaso ngo-2021.
“Ngijabule ngokubuyela eqenjini lesizwe,” kusho uMbule ecashunywa yiPirates Media Team.
“Njengoba nazi, kade ngagcina ukubonakala ejezini leBafana Bafana. Ngijabule ngokuthi umsebenzi engiwenzayo usungibuyisele eqenjini lesizwe, sekusezandleni zami ukuthi ngizikhandle ukuze ngihlale.”
IBafana izobhekana neLesotho ngoLwesihlanu, bese ibhekana neNigeria ngoLwesibili kweyokuhlungela i-2026 FIFA World Cup.
“Siyazi sonke le midlalo ibaluleke kangakanani ezweni. Sifuna ukuyinqoba yomibili, sizibikisele indawo kwiWorld Cup.”