Umqeqeshi weChippa United uMorgan Mammila uthi bekumele bavalele okungenani amagoli amathathu emdlalweni wabo ne-Orlando Pirates ogcine uphele ngo 1-1 eNelson Mandela Bay Stadium.
IPirates ikore kuqala kulo mdlalo, uBandile Shandu evalela ibhola elihle elifakwe wuRelebohile Mofokeng ebhokisini ngomzuzu ka-24. IChippa ibuye ngamandla esiwombeni sesibili uGoodman Mosele obolekwe kwiPirates evalela igoli elihle ngomzuzu ka-65. Ugcine eqokwe njenge-man of the match ekupheleni komdlalo.
Ekhuluma ngemuva komdlalo uMammila ukhale ngamathuba abawayekile kodwa washayela abadlali bakhe ihlombe ngendlela abadlale ngayo.
“Asikhulumeni iqiniso, angibukeli muntu phansi kodwa bekumele sivalele amagoli amathathu okungenani. Sibaphe igoli elilula, nabo basiphile, kodwa….uMulenga bekumele akore,” kusho uMammila.
“Umdlalo wesithathu manje kulandelana sihluleka ukuvalela amathuba alula. Kunzima ukubhekana nathi. Siyiqembu elingashayeki kalula…asizile ukuzoganga la, sifuna ukuncintisana nanoma yiliphi iqembu.”
Ekhuluma ngeMamelodi Sundowns abazobhekana nayo emdlalweni olandelayo uMammila ubeke kanje: “Ayize, nayo izothola okufanayo. Asilipaki ibhasi, sizoncintisana nayo, anginendaba nokuthi uwubani, siyalingana la.”