Obengumgadli waMaZulu FC, uLehlohonolo Majoro usephumele obala ngesifiso sokufinyelela kumagoli awu-100 kwiPSL. Lo mdlali odedelwe wuSuthu kuphela isizini unamagoli awu-91, ushodwa ngawu-9 kuphela ukuze afinyelele kwangu-100.
Lo mdlali uthi akananxa ngokudedelwa kuMaZulu ngesikhathi kuphela inkontileka yakhe ngesizini edlule, usazama ukuthola iqembu elisha.
“Sisasebenza…siyazi amaqembu athatha isikhathi ukuthi asayinise umdlali. Kumele bahlaziye abadlali abanabo ngaphambi kokuthatha isinqumo ngokusayinisa abadlali abazovala la okushoda khona,” kusho uMajoro.
Lo mdlali wathenjiswa umsebenzi kuMaZulu kodwa uthi okwamanje usafuna ukudlala enkundleni.
“Yinto engisazoyixoxa nosihlalo kodwa okwamanje, ngisawumdlali webhola futhi ngifuna ukufinyelela kumagoli awu-100.”