Umdlali weMamelodi Sundowns uThembinkosi Lorch uthembisa ukulibamba ngezandla zombili ithuba lokudlala uma egcina enikezwe ijezi emdlalweni weDSTV Premiership abazowudlala ne-Orlando Pirates ngoMgqibelo.
ULorch (30) wasayina kwiDowns ngosuku lokuvalwa kwewindi ngoJanuary esuka kwiBucs ayesehlale kuyo iminyaka engu-8.
ULorch ufike kwinkomfa yabezindaba ehamba nomqeqeshi uRulani Mokoena. UNyoso uqale ngokubonga iBucs noSihlalo uDr. Irvin ngokumnikeza ithuba lokudlalela iqembu.
“Ngifisa ukubonga iqembu engisuka kulo i-Orlando Pirates, ikakhulukazi uDr Irvin Khoza ngokunginikeza ithuba lokudlalela iqembu elikhulu njengaleli.
Ngasayina kwiBucs ngineminyaka engu-22. Ngihambe sengineminyaka engu-30. Ngiyabonga ngethuba engalinikezwa. IPirates iyohlezi inendawo ekhethekile enhliziyweni yami.
Ngibonga noMengameli weMamelodi Sundowns ngokukholelwa kimi. Ngizimisele ngokuzikhandla eqenjini,” kubeka uLorch.
ULorch uthi wamukelwe ngezandla ezimhlophe eChloorkop.
“Iqembu lingamukele ngentokomalo. Umoya uphezulu eqenjini. Bonke abadlali bafuna ukudlala ngempelasonto ngoba sizobhekana nePirates. Lomdlalo ubalulekile. Isikimu sizoqokwa umqeqeshi,” kuchaza uLorch.
Lomdlali uthembisa ukuzimisela uma enikezwa ijezi eLoftus Versfeld.
“Kuzoba Naima ukudlala okokuqala, ikakhulukazi ngoba sizodlala neqembu lami lakudala. Impilo iyakuphoqa ukuthi uqhubekele phambili kwesinye isikhathi.
Ngithemba ukuthi ngizowuqala umdlalo ngempelasonto, ngisize iqembu,” kuchaza uLorch.