Umqeqeshi weLiverpool, uJurgen Klopp, uthi kuzoba nzima ukungena kwi-top 4 yePremier League kule sizini ngenxa yezingqinamba ababhekene nazo.
ILiverpool ishaywe iBrentford ngo 3-1 ngoMsombuluko okuyishiye ihleli kunombolo 6 kwi-log yePremier League. Isele ngamaphuzu ayisikhombisa kwiManchester United ekunombolo 4.
Ekhuluma ngemuva komdlalo uKlopp uveze ukuthi iqembu lakhe libhekene nezinkinga eziningi ezinye zazo ezidalwe yindlela abadlale ngayo ngesizini edlule. Ngesizini ka-2021/2022 iLiverpool ifinyelele kuwo wonke ama-final ebingadlala kuwo; FA Cup, EFL Cup nakwi-UEFA Champions League.
Iqede isizini yePremier League ikunombolo 2, isele ngephuzu elilodwa kompetha iManchester City. Ngesizini edlule iLiverpool idliwe kabili kuphela isizini yonke, kulokhu isisuthe induku kahlanu emdlalweni ewu-17.
“Ngathi siyakhokhiswa ngendlela esidlale ngayo ngesizini edlule. IPre-season nayo ibingekho lula njengoba besiye e-Asia, kwalimala abadlali. Kudingeke nokuthi sidlalise abadlali abangaluleme ngokuphelele ngenxa yokushodelwa abadlali,” kuchaza lo mqeqeshi.
“Sidlala kwiligii enzima. Izinkinga zakho azisho lutho, kumele udlale ngezinga eliphezulu ngaso sonke isikhathi. Kuthe sekuba ngcono kwaphinde kwalimala abanye abadlalai. UDiogo Jota usalimele, uLuis Diaz uphinde walimali.”
Ngaphambi komdlalo neBrentford uKlopp wathi kuzoba nzima ukungena kwiChampions League yangesizini ezayo njengoba sekusele izindawo ezimbilu kuphela kwi-top 4. Ngokwakhe, i-Arsenal neManchester City ngeke besaphuma kwi-top 4. Lokho kusho ukuthi kusele izikhala ezimbili kuphela ezizobangwa yiNewcastle United (3), Manchester United (4), Tottenham Hotspur (5), Liverpool (6) neChelsea (10). IBrighton neBrentford nabo uma beqhubeka nendlela abadlala ngayo bangazithola sebephakathi empini yokungena kwiChampions League ngesizini ezayo.