Umqeqeshi weLiverpool uJurgen Klopp ucikwe isitayela seTottenham Hotspurs ayisola ngokupaka ibhasi bukhoma.
UKlopp ukhalaza nje ezakhe zibanjwe e-Anfield Stadium ngo 1-1 yiSpurs esiqeqeshwa u-Antonio Conte.
ILiverpool ibiwuphethe umdlalo kodwa ihluleka ukugqobhoza iSpurs ebesihlasela ngokuzumisa. ISpurs sishaye igoli lokuqala elivele kuSon Heung-Min ekuqaleni kwesiwombe sesibili. ULuis Diaz ubuyise ithemba kwiLiverpool eshaya elokulinganisa ngomzuzu ka-74.
Lomphumela ubuyisele iLiverpool emuva embangweni wePremier League njengoba isilingana neManchester City enomdlalo owodwa esandleni. Lamaqembu abambene emaphuzwini angu-83.
“Ngiyaxolisa, angiyena umqeqeshi ongafundisa lelibhola. Angiyithandi indlela abadlala ngayo. Kodwa imina onenkinga, basezingeni eliphezulu impela, kufanele benze okukhulu kunalokhu abakwenzayo.
Bebengaliphethe ibhola emdlalweni, nginenkinga ngalokho. Angisoze ngalifundisa lelibhola. Angeke ngilunge. Abadlali beSpurs bavala wonke amabhola, kunzima impela. Kulungile ibhola abalijwayele. Angeke ngilunge. Ngiyayihlonipha indlela abadlala ngayo, kodwa angeke ngilunge mina.
ILiverpool izokwehla esicongweni uma iMan City ibhaxabula iNewcastle namuhla. UKlopp uthi angeke abagxeke abadlali, bakwenze konke obekufuneka.
“Iphuzu libalulekile kakhulu. Sisesicongweni kodwa siphoxekile. Abadlali baphoxekile nabo, nima ngimdala sengikubone konke. Sikwazile ukufaka ingcindezi. Inkinga sithathe izinqumo ezibhedayo. Kulula uma kukhuluma mina. Bekufanele siwine kodwa neSpurs besingawina ngoba sihlasela ngokuzumisa,” kusho uKlopp.