Umqeqeshi we-Orlando Pirates uJose Riveiro uthi iDSTV Premiership yisona sicoco okufanele balwele ukusinqoba kule sizini, yize beqeda ukuphakamisa iMTN 8 emasontweni amabili adlule.
IBucs idlulele kuma-quarterfinals eCarling Knockout ngemuva kokushaya iCape Town Spurs ngo 2-0 e-Orlando Stadium ngoLwesihlanu.
Ekhuluma nabezindaba ngemuva komdlalo, uRiveiro uchaze ngokubaluleka kokuqoqa amaphuzu kwiligi.
IBucs isele ngamaphuzu angu-17 kwiMamelodi Sundowns ehleli esicongweni. Okungenzeka kujabulise uRiveiro ukuthi ezakhe zinemidlalo emithathu esesandleni.
“Iligi iyona ebaluleke kakhulu. Sifuna ukubamba umgqigqo kwiligi. Sidlale imidlalo emibili kuphela kwiligi ezinsukwini ezingu-66, okuyinto engajwayelekile. Besidlala kumqhudelwano wesine kulesizini ezinyangeni ezine. Sizama ukunyusa izinga kuyona yonke imiqhudelwano esiyidlalayo,” kuchaza lomqeqeshi.
Lomqeqeshi uthi ukudlala kwimiqhudelwano ehlukene kuyabagqilaza abadlali. Uthi bazimisele ngokubuya namaphuzu amathathu uma sebedlala noSuthu namuhla ebusuku.
“Kunzima ukumelana nengcindezi yokudlala kwimiqhudelwano ehlukene ekubeni sinesikhathi esincane sokuhlelela imidlalo.
Sifuna ukudlala ngomgqigqo ofanayo ngisho kwiligi. Sibheke ukudlala namaZulu ngoLwesibili. Bonke abaqeqeshi bayakwazi ukubaluleka kweligi.
Angichazi ukuthi eminye imiqhudelwano ayibalulekile. Umqhudelwano ubalulekile ngendlela yawo. Kuyithuba lokushintsha umlando weqembu,” kubeka uRiveiro.
IBucs izovakashela Usuthu emdlalweni weligi ozobanjelwa eMoses Mabhida Stadium namuhla ebusuku.
AmaZulu ahambela phezulu njengoba ekhiphe iKaizer Chiefs kwiCarling Knockout ngempelasonto. AmaZulu ashaye iChiefs ngo 1-0 eFNB Stadium ngoMgqibelo.