Umqeqeshi weStellenbosch uSteve Barker uvukelwe umunyu beqeda ukunenebula iRichards Bay ngo 3-0 emdlalweni owandulela owamanqamu weCarling Knockout ngoMgqibelo.
UBarker ubonge lomphumela kumalume wakhe uClive Barker nowayengumdlali weStellies u-Oswin Andries, bobabili abangasekho emhlabeni.
U-Andries washona ngoFebruary ngemuva kokugwazwa endaweni yokucisha ukoma eKapa.
UBarker, owayehola iBafana Bafana eyanqoba i-Africa Cup of Nations ngo-1996, wadlula emhlabeni ngomhlaka 10 kuJuni kulandela ukuxinwa ukugula isikhathi eside.
IStellies sizidlele amahlanga kwiNatal Rich Boyz ebihluleka nokuhlanganisa amaphasi yize idlalela ekhaya eKing Zwelithini Stadium. Amagoli eStellies ashaywe uDevin Titus, Anicet Oura no-Antonio Van Wyk esiwombeni sesibili.
IStellies sizobhekana neTS Galaxy kowamanqamu ozobanjelwa eMoses Mabhida Stadium ngomhlaka 16 kuDisemba. IGalaxy ihlule AmaZulu ngo 3-2 eMabhida ngeSonto.
“Salahlekelwa elinye lamasosha u-Oswin Andries ekuqaleni konyaka. Ngashonelwa umalume uClive. Lomphumela ngiwubonga ku-Oswin noClive. Ngiyathemba ukuthi sizoyinqoba lendebe eThekwini emasontweni amabili alandelayo. Sesihlalelwe ijoka lokunqoba kowamanqamu,” kubeka uBarker ekhuluma nabezindaba.
IStellies singene kowamanqamu ngemuva kwemizamo emibili sibhajwa esigabeni esandulela owamanqamu. Leliqembu lihlulwe yi-Orlando Pirates kwiMTN 8 kulesizini. Ngesizini ephelile iStellies saphuma kwisemifinal yeNedbank Cup.
“Sishaye udaka esiwombeni sokuqala. Besitatazela ngoba yesigaba. Sihluleke kabili ukudlulela kowamanqamu ngaphambilini, yingakho abadlali bekhombise amatata.
Nayo iBay ibihluleka ukusithwalisa kanzima esiwombeni sokuqala. Umdlalo uvuleke esiwombeni sesibili sekungene igoli lokuqala.
IRichards Bay iphoqelekile ukuthi idlale ibhola ngoba ibilandela ngemuva. Sikwazile ukuyihlasela ngokuzuma ngemuva kwalokho. Ngibongela abadlali ngoba kubafanele ukufinyelela kowamanqamu,” kubeka uBarker.