Sphamandla Gumede
Isiteshi esingungqa phambili ngabalaleli eNingizimu Afrika, Ukhozi FM, lumemezele izinguquko ezithinta abasakazi, ezizoqala ukubonakala ngomhlaka 01 Ephreli 2021.
Lesi siteshi esinabalaleli ababalelwa ngaphezulu kuka-7 million, sihlela ukufinyelela kubalaleli abangu-8 million ngonyaka ka-2023.
USipho Mbatha okhuza ibuya uzodidiyela uhlelo lwesidlo sasekuseni 06h30 – 09h00) ngoMsombuluko kuya kuLwesine. UMbatha uzojoyinwa intandokazi yabalaleli uNonhlanhla “Mroza” Buthelezi. Bobabili lwabasakazi bake babambisana ohlelweni lwe-Afternoon Drive ngo-2008.
UDudu “Lady D” Khoza, uzolandela nohlelo lwakhe oluphela ngo-12h00 emini njalo maphakathi nesonto.
Uhlelo luka-(12h30 – 15h00) luzobanjwa uBheka Beekay Mchunu okhulise loluhlelo, walubeka kubalaleli abangu-3,1 million. USiya Mhlongo no Selby “Selbeyonce” Mkhize bazoshayela i-Afternoon Drive maphakathi nesonto kusukela ngehora lesithathu kuya kwelesithupha.
Umsakazi ongaconsi phansi kubalaleli bamaMaskandi uTshathugodo Ngobe uzoyibamba ngo-00h00 ebusuku aphume ngo-03h00 ezintathakusa njalo ngoMsombuluko kuya kuLwesithathu. Uzophinde abuye ngoMgqibelo ngo-12h00 aphume ngo-15h00.
UNongcebo McKenzie uzoshayela uhlelo lwasebusuku (20h00 – 00h00) njalo ngoMsombuluko kuya kuLwesine.
UZimiphi Biyela uzoshayela uhlelo lwangeSabatha lukaMaskandi, oluqala ngo-09h00 ekuseni luphele ngo-12h00 emini.
UZama Mseleku owanqoba umncintiswano weWinnie Mahlangu Presenter Search, uzobamba uhlelo olusha sha lwangeSonto ezintathakusa luphele ekuseni (03h00 – 06h00). Intandokazi uSbu Buthelezi uzoqhubeka nohlelo lweGospel oselushintshe isikhathi. Luzoqala ngo-09h00 ekuseni luphele ngo-12h00 emini.
Imenenja yesiteshi uSbongi Ngcobo ubeke kanje.
“Ukhozi FM luhambela phezulu, luyaqhubeka nokuhlula eminye imisakazo. Lokhu kuzoqhubeka onyakeni ka-2021/2022 njengoba sifuna ukuletha izinhlelo ezihlabahlosile ezizokhanga abalaleli,” kubeka uNgcobo.