Kubukeka isishaywe ngesitini iMan City ebishela umdlali weBayer Leverkusen uFlorian Wirtz (21) okuvela ukuthi usexoxisana neReal Madrid ukuthi ayijoyine ngo-2025.
Ngokwemibiko yezinyanga ezedlule, umqeqeshi weMan City uPep Guardiola ubezimisele ngokusayinisa lo mdlali njengonombolo 10 wakhe omusha njengoba sesisemome isikhathi sokuhamba kukaKevin de Bruyne noBernado Silva.
IMadrid iphethe okhilimu bonombolo 10 esingabala kubo uBrahim Díaz (24), Jude Bellingham (20) Arda Güler (19) noLuka Modric (38) okubikwa ukuthi uzobe edlala okokugcina kwiLos Blancos ngesizini ezayo.
𝟕 𝐒𝐄𝐂𝐎𝐍𝐃𝐒.
— Factos (@Facts9000) March 24, 2024
Florian Wirtz's first international goal is the 𝐅𝐀𝐒𝐓𝐄𝐒𝐓 goal in Germany's history.pic.twitter.com/HOZJCIG0PF
UBellingham abaningi babona ikusasa lakhe likonombolo 8, lokhu okubizwa nge box to box, okungavulela uWirtz isikhala endaweni kunombolo 10.
UWirtz, ovalele amagoli awu-11 nama assist awu-11 kwiBundesliga, uyakwazi nokudlala ophondweni, ikakhulukazi kwesokunxele, okuyindawo kaVinicius Jnr.
Ukukhuluma kweMadrid noWirtz kubeka ngokusobala leli qembu laseSpain elinqobe iChampions League okwesi-15, kungasho nokuthi ziyaqhubeka izingxoxo nomqeqeshi weLeverkusen uXabi Alonso ukuthi apheke leli qembu kusukela ngesizini ka-2025/26.