Isitobha seBafana Bafana uGrant Kekana sithi bazolwela ukuthola umphumela ozobadlulisela esigabeni somkhumulajezi uma sebetholana neTunisia emdlalweni wokugcina wamaqoqo namuhla ebusuku.
Lamaqembu azotholana phezulu e-Amadou Gon Coulibaly Stadium, emdlalweni ozocacisa ngamaqembu azowasha ijezi kuGroup E.
“Siqedile ngezinhlelo zomdlalo weTunisia. Ukuzethemba kuphezulu, bonke abadlali bawulindele lomdlalo. Asifuni ukuwashiswa ijezi, sizolwela ukuthola umphumela ogculisayo,” kuchaza uKekana esithangamini nabezindaba ngoLwesibili.
IBafana izongena igijima kwi-last 16 uma izothola iphuzu elilodwa kwiTunisia. IBafana isengaputshukela kwi-last 16 uma Iqede endaweni yesithathu ngerekhodi elingcono kunamanye amaqembu.
Umqeqeshi weBafana uHugo Broos uthi banethuba lokudlulela kwi-last 16. Lomqeqeshi ukhale ngokuthi iTunisia ithole usuku olwengeziwe lokulungiselela lomdlalo.
“Besinombandela wokudlulela esigabeni somkhumulajezi, sinethuba lokwenza lokho namuhla. Kungiphatha kabi okwenzekayo ngoba iTunisia ithole usuku olwengeziwe lokucijela lomdlalo. Kuphezulu ukuzethemba kubadlali njengoba sinqobe kwiNamibia.
Siyakwazi esingakuzuza namuhla, siwulindele umdlalo. Sizolwela ukubuya nomphumela ongcono. Kufanele singahlulwa, lowo umphumela ozosifaka kumzuliswano olandelayo,” kuchaza uBroos.