Umqeqeshi weSuperSport United uGavin Hunt usedalule izindaba ezibuhlungu ngoThulani Hlatshwayo ozohlala isikhathi eside engadlali ngenxa yokulimala eqakaleni.
UHlatshwayo (34) ugcine ukubonakala emdlalweni weCAF Confederations Cup behlulwa i-USM Alger ngo 2-0 ePeter Mokaba Stadium ngomhlaka 3 kuDisemba.
UHlatshwayo wakhishwa esiwombeni sesibili kulomdlalo, indawo yakhe yathathwa uKeagan Johannes.
UTyson ubengekho emidlalweni emihlanu edlule, okuphoqe uHunt ukuthi asebenzise u-Ime Okon, Bilal Baloyi noSiyanda Xulu endaweni yakhe.
“UTyson ulimale iqakala. Sekuphele inyanga engadlali, silahlekelwe kakhulu,” kubeka uHunt ekhuluma nabezindaba.
UHunt ukhale ngekhadi elibomvu elitholwe u-Okon emdlalweni weDSTV Premiership abawuhlulwe ngo 3-1 bebhekene neRichards Bay esempini yezembe.
UGhampani Lungu ushayele iSuperSport igoli lokuqala kulomdlalo, izinto zabhimba sekukhishwe u-Okon ngekhadi elibomvu.
“Asinabo abadlali abazovala izikhala zabangekho. Bekufanele senze izinguquko eziphoqayo. Sinebhadi lokuthola amakhadi above kulesizini, kufanele senze kangcono,” kubeka uHunt.
ISuperSport yehleli endaweni yesithathu kwiDSTV Premiership ngemuva kwemidlalo engu-16.