Ukhethe ukusihoxisa isicelo sebheyili uFaith Nongcebo Ntombela osolwa ngokubulala umyeni wakhe uCaptain Thomas Zwelakhe Ntombela.
UNongcebo ubevele enkantolo yemantshi eMlazi ngoLwesithathu ebigcwele phama, esaqhubeka nokusineka into engekho njengoba ebenza nangeledlule.
Uboshwe kulandela ukukhonjwa yinkabi esigwetshiwe njengongqondongqondo ngokubulawa kukaCaptain Ntombela. Ngesikhathi iquliswa icala yavuma esolwa ngakho, yagwetshwa iminyaka ewu-20 yabe isiphenduka ufakazi woMbuso ecaleni likaNongcebo.
WATCH: Faith Nongcebo Ntombela who was implicated by a hitman, Mzo Ntombela, appears at the uMlazi Magistrate’s court. Faith allegedly team up with a prisoner, (Khulani Cele) and they hired Mzo to kill her husband, Capt Zwelakhe Ntombela. Faith abandoned her bail. @TimesLIVE pic.twitter.com/mbcJLO8OfU
— Sakhiseni Nxumalo (@SakhiNxumalo) September 5, 2023
UNtombela, obesesebenzele amaphoyisa omkhandlu iminyaka ebalelwa ngaphezulu kuka-30, wabulawela kwakhe eMlazi ngoMay 3 kulo nyaka.
Ngeledlule umsolwa ucasule abomndeni kabi enkantolo ngendlela abeziphethe ngayo ngesikhathi evela okokuqala. Namhlanje abangani nabomndeni babuyole enkantolo bezoyigqugquzela ukuthi anganikwa ibheyili uma efaka isicelo.
UNongcebo uzobuyela enkantolo ngo-October 9 kulandela ukulaxaza isicelo sebheyile.
Khonamanjalo, okhulumela amaHawks KwaZulu-Natal, uCaptain Simphiwe Mhlongo ngeledlule uveze ukuthi kusazoboshwa abanye kuleli cala.