Umdlali we-Orlando Pirates uDeon Hotto uthi bazokwehlisa kancane emidlalweni yezinkomishi, baqinise kweyeBetway Premiership neCAF Champions League ngoba yizona izindebe abazifunayo kulesizini.
IBucs yagcina ukudla isicoco seligi ngesizini ka-2011/12. Ngesizini edlule, iPirates ivikele iMTN8 neNedbank Cup ihlula iMamelodi Sundowns kuyona yomibili imiqhudelwano.
UHotto uthi sebekhathele ukuwina izinkomishi.
“Ukuvikela iMTN8 neNedbank Cup akuyona inkinga, ukuwina iligi neChampions League yikhona okubalulekile manje. Lezinkomishi ezimbili aziyona inkinga.
“Besikhuluma ekhempini ukuthi sizoqinisa embangweni weligi nakuChampions League. Sizokwenza okusemandleni ukunqoba iligi ngoba sinolwazi lokunqoba ezinye izinkomishi,” kubeka uHotto ekhuluma nabezindaba.
UHotto ungomunye wezethenjwa kwiBucs njengoba edlaliswa ezindaweni ezahlukene. Emidlalweni engu-166, uHotto useshaye amagoli angu-21, wakhandela ozakwakhe angu-30.
UHotto uthi ukubuya neligi neChampions League abakwenzekeli uSihlalo nabalandeli kuphela.
“Sineqembu eliqinile, umqeqeshi uzoqala isizini yesithathu manje. Usenolwazi olugcwele ngeqembu, usiko nendlela yokudlala. Usekhululekile manje, iqembu sekuyikhaya lakhe.
“Umqeqeshi uyakwazi okufanele akwenze kulesizini ezoqala, sizomsiza singabadlali. Siyayiqonda ingcindezi ekhona ngoba leliqembu likhulu.
“Asifuni ukuwina iligi ukuze sibungaze umqeqeshi kodwa sizoziwinela think singabadlali nabalandeli kanye noSihlalo. Ingcindezi iyohlezi ikhona, nakulesizini sizolwela ukuqhwakela esicongweni kusukela emdlalweni wokuqala.
“Ingcindezi sizifakela thina singabadlali, asitshelwa uSihlalo. Singabadlali sifuna ukuhlala esicongweni kusaqala iligi kuze kuyovalwa,” kubeka uHotto.
IPirates izovula isizini ngomdlalo weMTN8 neSuperSport United. Lomdlalo uzobanjelwa e-Orlando Stadium ngomhlaka 3 ku-Agasti.