Umqeqeshi weManchester City uPep Guardiola usencome abadlali bakhe ngokukhombisa ukuqina ukhakhayi ezinyangeni ezimqoka embangweni wesicoco seligi njengoba sebehlela ukugudluza i-Arsenal esicongweni ngemuva kokuxebula iChelsea ngo 3-0.
ICity, enomdlalo esandleni, isisele ngamaphuzu ayisithupha kuphela kwi-Arsenal ngemuva komdlalo wayizolo, kanti basazotholana phezulu e-Etihad Stadium ngeSonto.
Echaza ngokusondela ngalendlela kwi-Arsenal noma sekunezinyanga abaningi bathi isisinqobile isicoco seligi, uPep ubonge abaphathi beqembu ngokumnikeza abadlali abasezingeni eliphezulu.
“Abaphathi banginikeze abadlali abaqine ukhakhayi, abakwazi ukuqhudelana nabanye abafana, okuwukhiye wempumelelo,” kuphendula yena.
“Ngiyabaphusha, nabo bayangiphusha…sineqembu elihle esiliqinise ngabadlali abafike bangenxa khaxa ngoJanuary. Umdlalo wethu ne-Arsenal siwuthatha njengomdlalo wamanqamu, ngiyazi nabo bazowuthatha ngendlela efanayo.
“Sidlale kahle esiwombeni sesibili [neChelsea]. Kulesi sigaba akusebenzi amaqhinga, kusebenza isimo somqondo kubadlali. Sekunesikhathi eside sazana nalaba badlali, bayakwazi okufanele bakwenze ukuze benqobe umdlalo, okuyinto okungelula ukuyenza eStamford Bridge.”
Lo mqeqeshu uqhube wathi i-Arsenal, eshaywe yiBournemouth ngo 2-1 ngoMgqibelo, isayiqembu eliphambili ukuwadlula onke amanye e-England kodwa okubalulekile okwenzeka ekupheleni kwesizini.
“Sinesonto lonke lokulungiselela umdlalo, futhi sizowulungiselela kahle ngoba uzoba nzima. Ngimazi kahle umqeqeshi wabo nokuthi uyakwazi ukushintsha izinto.
“Sizohlaziya umdlalo weCarabao Cup sibone sishintshani ukuze sizodlala kangcono. Uma ningakhuli njengeqembu phakathi kuka November, January noFebruary, ngeke nisiwine isicoco seligi.”