Umdlali omusha weMamelodi Sundowns uKeagan Johannes uzobhekana nomqansa wokuthola ijezi kuleliqembu elihlome ngabadlali abanohlonze.
UJohannes (23) uqinisekiswe njengomdlali omusha weSundowns ngoMsombuluko, ewela komakhelwane iSuperSport United abesehlale kuyo amasizini amathathu.
Lomdlali, onobuhlakani bokudlala emuva nasesiswini uzobanga ijezi noKhuliso Mudau, Thapelo Morena noZuko Mdunyelwa.
UJohannes ulandela ngemuva kuKobamelo Kodisang no-Arthur de Oliveira Sales kubadlali abasayiniswe yiDowns ngaphambi kokuqala kwesizini.
UJohannes uthi uqale waxoxisana noGrant Kekana ngaphambi kokujoyina iqembu.
“Ngibabuzile abadlali ngeqembu (Sundowns) nangendlela ekwenziwa ngayo izinto. Bangitshelile okufanele ngikulindele. Ngiyazi ukuthi iqembu lilwela ukushanela izindebe, yilona usiko leqembu. Nami ngiyafuna ukunqoba njengomdlali, akungiphathi kahle ukuhlulwa emidlalweni,” kubeka uJohannes ekhuluma kwiThe Pitchside Podcast.
UJohannes ushaye into ecokeme kwiSuperSport yize ephazanyiswe ukulimala ngesizini ka-2023/24.
UJohaness ulandela u-Aubrey Modiba, Tebogo Mokoena, Grant Kekana, Ronwen Williams, Sipho Mbule noThapelo Maseko abasayine kwiDowns besuka kwiSuperSport kumasizini adlule
UJohannes ubonge iSuperSport ngokumenza umdlali ongcono.
“Ngiyabonga kwibhodi leqembu nakuSihlalo (Stanley Matthews) ngokukholelwa kimi. Ngibonga nakubasebenzi beqembu nasethimbeni labaqeqeshi. Ngiyabonga kakhulu ngoba ningenze umdlali ongcono.
“Ngiyabonga kakhulu nakubadlali, kuningi esikuzuzile sindawonye. Besifana nobhuti kuleminyaka esiyihlale ndawonye. Ngiyavalelisa kubalandeli beqembu ebengilibiza ngekhaya kuleminyaka emithathu eyedlule,” kubeka uJohannes.
Kulindelwe ukuthi uJohannes alekelele iDowns ezobe imatasa nemiqhudelwano eyisithupha kulesizini ezoqala. IDowns izodlala kwiMTN 8, Carling Knockout Cup, CAF Champions League, CAF African Football League, Nedbank Cup neFIFA Club World Cup.