Owayeyisitobha seKaizer Chiefs neSuperSport United, uMorgan Gould, usezwakalise injabulo ngokuqashwa njengephini lesibili likaBrandon Truter kwiSekhukhune United.
IBabina Noko iqinisekise lezi zindaba kuleli sonto. UGould uzojoyina uMcDonald Makhubedu ekulekeleleni uTruter ngomsebenzi wokupheka iSekhukhune kulandela ukushaya umsebenzi oncomekayo epheka iqembu eligijima kwiDStv Diski Challenge (DDC).
“Ngijabule kakhulu ngomsebenzi wami omusha. Ngifunde ukubekezela kwiDDC, ngafunda nokusebenzisana nabanye abantu.
“Inhloso yami ukukhula kwezokuqeqesha nokuthi ngivulele abadlali abasafufusa izikhala eqenjini. Ngifisa ukulekelela umqeqeshi azuze afuna sikuzuze kule sizini, sijabulise abalandeli beSekhukhune.”
ISekhukhune ikhuphukele kunombolo 11 kwi-log yeDStv Premiership kulandela ukunqoba imidlalo emibili kulandelana, kowokugcina ishaye iChiefs ngo 1-0. NgoMgqibelo izobhekana neStellenbosch FC edinga amaphuzu njengoba isihleli kunombolo 13 kwi-log.