Isitobha saMaZulu uTaariq Fielies sifuna bangayizweli nakancane iCape Town Spurs abazobhekana nayo emdlalweni weDSTV Premiership namuhla ebusuku.
ISpurs sibambe amabhuleki ezembeni njengoba siwukudla kwenduku. Nomqeqeshi weqembu u-Ernst Middendorp uzwakala evuma ukuthi ezakhe zizodliwa yizembe ngoba abadlali abakhona abekho ezingeni.
AmaZulu asethubeni lokungena kwi-top 8 uma ebuya namaphuzu kulomdlalo.
“Iqembu elihleli emsileni lifuna amaphuzu ngenkani. Badlalela izimpilo zabo ngoba abakusabi ukuhlulwa. Bawafuna ngenkani amaphuzu.
“Sifuna ukuqhuba umgqigqo wokunqoba, siyakwazi esingakwenza. Angeke sizitshele ukuthi sizonqoba ngoba iqembu esizodlala nalo lisemsileni. Kubalulekile ukuthi sinqobe ngoba umdlalo oweligi. Sifuna ukukhuphukela endaweni engcono,” kuchaza uFielies ekhuluma nabezindaba.
UFielies uthi baphunyukwe ithuba elikhulu behlulwa ukungena kowamanqamu weCarling Knockout owabanjelwa enkundleni yabo iMoses Mabhida.
“Bonke abadlali bebefuna ukudlala kowamanqamu. Bekuyibhadi ukungayitholi imiphumela esingayifuni.
“Ngibona sinethuba lokunqoba ezinye izindebe eminyakeni ezayo. AmaZulu azogcina eyinqobile indebe,” kubeka uFielies.
Usuthu luhleli endaweni yeshumi kwiDSTV Premiership ngemuva kwemidlalo engu-14. Leliqembu seliqoqe amaphuzu angu-18.