Umdlali weCape Town City omusha uHaashim Domingo uthembisa ukuzinikela ngokusemandleni ekusizeni iqembu ngesizini ka-2024/25.
UDomingo usayine inkontileka yeminyaka emibili enombandela wokwelulwa ngomunye unyaka kuleliqembu elizinze eKapa.
Lomdlali ukhuza ibuya kwiDStv Premiership njengoba ededelwe yiRaja Athletic Club yaseMorocco ebimkhuhlisa ngebhentshi.
UDomingo (28) ubonakale emidlalweni elishumi isizini yonke kuleliqembu eliphekwa uJosef Zinnbauer owayecija i-Orlando Pirates ngaphambilini.
Lomdlali, oseke wayibamba kwiCape Town Spurs, Bidvest Wits neMamelodi Sundowns, uthi iqembu libaluleke ukudlula izinhlelo azibekele zona eceleni.
“Ibhola elidlalwa yiqembu lingiyengile. Isitayela seqembu naso ngiyasibala. Ukubuya eKapa kungesinye isizathu esingihehile.
“Ngifuna ukusiza iqembu likwazi ukuphumelela. Ngizibekele nombandela wokushaya amagoli nokuwakhanda. Kodwa iqembu libaluleke kakhulu kunalokhu engikubalile. Umndeni nokholo luyisisekelo empilweni yami. Ukuzinikela nokuzikhandla kuzongisiza kakhulu,” kuchaza uDomingo esitatimendeni esikhishwe yiqembu.
UDomingo uthi usizwe ukuqinisa okholweni ngesikhathi izinto zingamhambeli kahle eMorocco.
“Bengisizwa ukholo kwizingqinamba ebengibhekene nazo kuleso sikhathi,” kubeka uDomingo.
“Ngingumdlali othanda ukuphatha ibhola, ononyawo oluhle. Ngiqinile uma ngizokwenza lokho. Angiwasebenzisi amandla ebholeni kodwa ngiqinisa onyaweni kakhulu.
“Ngikulindele ngabomvu ukudlala phambi kwabalandeli, ngiyathemba bazophuma ngobuningi bezokweseka iqembu,” kubeka uDomingo.
ICity iqinisa isikwati ngesipiliyoni njengoba isiwaqalile amalungiselo esizini ezayo. Leliqembu selisayinise uSibusiso Ziba, Elson Sithole, Prince Tijueza, Kamohelo Mokotjo, Carlinhos noFortune Makaringe.