Umqeqeshi omusha weMamelodi Sundowns uMiguel Cardoso ubheke ukuncela isipiliyoni nolwazi kuSteve Komphela noKennedy Mweene abasalile ethimbeni lasebhentshini kuxoshwa obengumqeqeshi uManqoba Mngqithi namaphini akhe.
UMngqithi ukhonjwe indlela, walandelwa uRomain ‘Fohloza’ Folz noWendell Robinson obelolonga onozinti.
UCardoso ufike nethimba lakhe alithembile uFabio Fernandes, João Araújo noPedro Azevedo.
UCardoso uyiphikile eyokuthi ugcine uKomphela ngoba efakelwe ingcindezi abaphathi.
“Ngijabule ngethimba engizosebenza nalo, bekuwumqondo ophusile ukugcina uKomphela noKennedy ngoba ngizoncela isipiliyoni kubona. Kuningi abazolekelela ngakho eqenjini ngoba banamava.
“Isipiliyoni abanaso sizolekelela futhi bazosihlaziyela okuningi ngoba besondelene nabadlali. Kunezizathu eziholele ekutheni sibagcine. Lesinqumo ngisibone siphusile, angikaze ngifakelwe ingcindezi ngaso.
“Nginqume ukusebenzisana noKomphela noMweene ngoba bezongilekelela uma sekufanele ngithole imiyalezo ethimbeni lodokotela nabahlaziyi. Ngizosizwa uMathias (Zangenberg) noSandiso abakhona eqenjini,” kubeka uCardoso ekhuluma esithangamini sabezindaba.
UCardoso uzibophezele ngokusebenzisana nabahlaziyi nethimba lodokotela abekade bekhona iDowns icijwa uMngqithi.
“Ngizoqhubeka ngilekelelwe abahlaziyi beqembu, ithimba lodokotela kanye nalabo abahlela umjezi. Ngibala nezikhulu, ngizimisele ukuzwa uvo lwabanye abantu engizobe ngisebenza nabo.
“Impela ngiwumuntu oqinisa isandla kodwa ngiyazithoba ngibingelele. Okubalulekile ukuthi sidlale ibhola eligculisayo. Ngifuna siphakamise amasokisi eqenjini, nami ngiyazibala lapho. Ngilindele ukusebenza nabantu abazolalela, bencele ulwazi ngoba ngizolekelela kuleliqembu.
“Angifani nomphathi noma umuntu ongafuni ukuchazelwa. Ubuholi bami buzoba yisibonelo. Ngizogqugquzela abasebenzi, ngizobahola ngoba bekholelwa kimi. Nginethemba lokuthi sizofinyelela lapho sifuna ukufika khona,” kusho uCardoso.