Umqeqeshi weBafana Bafana, uHugo Broos, ukhethe uPule Mmodi njengomdlali ozovala isikhala sikaThemba Zwane olimale emdlalweni weSundowns neChiefs ngempelasonto.
UBroos uphoxe abaningi ethi akekho umdlali weChiefs ofanelwe ukumela iqembu lesizwe njengamanje ekhuluma nabezindaba ngesonto elidlule. Ukulimala kukaZwane kugcine kuvulele uMmodi isikhala, kodwa akaqali ukubizwa njengoba ebebizwa esagijima kwiGolden Arrows.
Kulindeleke ukuthi uZwane ahlale amasonto amabili engadlali ngenxa ye-concussion.
Khonamanjalo, uBroos uvale isikhala sikaLuke le Roux ngoYaya Sithole.
IBafana izobhekana neNamibia ngoMgqibelo e-Orlando Stadium emdlalweni wobungani.