Umqeqeshi weBafana Bafana uHugo Broos ukholwa ukuthi iDR Congo ibizokhala yemuke nendondo yethusi ukube ikwazile ukusebenzisa amathuba ewathole emdlalweni we-playoff yombango wendawo yesithathu kwi-AFCON ngoMgqibelo ebusuku.
Unozinti uRonwen Williams uphinde ubuqhawe esiza iBafana inqoba ngo 6-5 emaphenathini. UWilliams uvimbe amaphenathi amabili.
Bekuyihlandla lesibili iBafana ibuya nendondo yethusi kwi-AFCON kwazise yaqeda endaweni efanayo ngonyaka ka-2000.
UBroos uthi iDR Congo ibingcono kakhulu kuneBafana. Lomqeqeshi uthi ukuzimisela kweqembu yikhona okubanqobise indondo yethusi.
“ICongo ibingcono kakhulu emdlalweni. ICongo ithole amathuba angcono.
Ngiwubone kanjalo umdlalo. Abadlali bazimiselile emdlalweni, bekufanele banqobe, ngiyaziqhenya ngabo,” kuchaza uBarker ekhuluma nabezindaba.
UBroos uthi ukuzinikela kwabadlali yize kunzima yisona isizathu esibawelise kwelibanzi.
“Ngasho sekuphele umdlalo weNigeria ukuthi ngiyaziqhenya ngabadlali, namuhla icacile inkulumo yami. Iqembu beligqilazekile, sesifinyelele emaphenathini izikhathi ezimbili.
“Sidlale neqembu eliphumule usuku olugcwele ekubeni asikaze siphumule. Nesimo sezulu besingesihle, abadlali bebekhathele.
“Ukuzimisela kwabadlali kungichazile, bayalwa kuze kube sekugcineni. Kukhona abaqhubeke nokulwa yize sebekhathele. Ngibona kusifanele ukunqoba lomdlalo,” kuchaza uBroos.