Umqeqeshi weBafana Bafana uHugo Broos uthi uzoyekela ukujezisa uJayden Adams uma esekhombisa ukufunda emaphutheni akhe.
U-Adams ushaywe ngesithende esikwatini seBafana esimatasa ngamalungiselelo emidlalo emibili yokuhlungela i-AFCON 2025. IBafana izobhekana ne-Uganda eKampala ngoLwesihlanu, ilandele ngeSouth Sudan eDHL Stadium, ngoLwesibili.
UBroos wathatha isinqumo sokuhoxisa u-Adams ekhempini ngo-Okthoba kuzodlalwa neCongo Brazzaville emidlalweni emibili, ekhala ngendelelo kulomdlali.
Ibhadi lilokhu limlandele njalo u-Adams osehlaliswa ebhentshini eqenjini lakhe iStellenbosch.
Lomdlali useke wadonsa isigwebo sekhadi elibomvu, waphinda wazidonsela amanzi ngomsele ethola ikhadi eliphuzi okwesine emdlalweni weligi neMarumo Gallants.
“Sengike ngakhuluma ngendaba yokuziphatha. Angeke uhambe ibanga elide ebholeni uma uhlulwa ukuziphatha ngendlela, akukhathalekile ukuthi unethalente.
“Amaphutha ajwayelekile kubadlali. Ngiyathemba ukuthi uzofunda emaphutheni akhe, yingakho ngimjezisa. Ziyamlandela nezinkinga selokhu ngamhoxisa ekhempini, neStellenbosch simbeka ebhentshini. Ngikholwa ukuthi unesizathu umqeqeshi, naye akeneme ngendlela aziphethe ngayo u-Adams.
“Angeke ngimbambele amagqubu uma ezofunda emaphuthebi akhe. Ngifisa afunde ukuthi ithalente lilodwa angeke likusize.
“Kufanele aziphathe ngendlela efanele, kungaba yishwa ukubona ikusasa lakhe limoshwa ukuthi akaziphethe kahle. Udinga ukulekelelwa ngoba usemncane ngokweminyaka.
“Akekho ekhempini njengamanje, ubengekho nasekhempini edlule. Ngiyathemba uzophaphama emaqandeni, ukungadlaliswa kwiStellenbosch kufanele kumvuse ebuthongweni,” kubeka uBroos ekhuluma nabezindaba eDobsonville Stadium, ngoMsombuluko.