Umqeqeshi weBafana Bafana uHugo Broos uthi ukushuba kombango wejezi esikwatini kumphoqile ukuba athathe isinqumo esinzima sokushiya ngaphandle uBongokuhle Hlongwane yize esefomini enhle neMinnesota United kwiMajor League Soccer (MLS).
IBafana imatasa ngamalungiselelo emidlalo emibili yokuhlungela i-AFCON 2025 abazoyidlala ne-Uganda eKampala ngoLwesibili, kulandele oweSouth Sudan ngoLwesibili.
IBafana isizibekisele indawo eMorocco kulandela umphumela womdlalo obuphakathi kweSouth Sudan neCongo ngoLwesine, onqotshwe yiSouth Sudan ngo 3-2.
Ekhuluma esithangamini nabezindaba eDobsonville Stadium ngoMsombuluko, uBroos uthe bekubuhlungu nakuye ukushiya uHlongwane kwazise ubefanelwe yindawo esikwatini.
UHlongwane ushaye amagoli angu-11, waba ngumvusi wenyamazane kumagoli amane emidlalweni engu-36 yeligi.
“UBongokuhle Hlongwane ubesefomini enhle e-America kulezinyanga ezedlule. Kodwa kunenqwaba yabadlali engibashiyile nabo abafanelwe ukungena esikwatini.
“Ngiyaphoqeleka ukuthatha izinqumo, kwakulula ukuthatha izinqumo eminyakeni emibili edlule ngoba laliphansi nezinga labadlali beBafana Bafana.
“Angifuni ukukhuluma ngabadlali abangekho ngoba izinqumo sezithathiwe, ngiyaqonda kungani kunemibuzo ngabanye abadlali abangabiziwe. Kunezinqumo ezinzima okufanele ngizithathe, akuchazi ukuthi loyo mdlali uyaboza.
“Iqiniso ukuthi ngihlalelwe umsebenzi wokunciphisa abadlali abangu-15 uma ngiqinisekisa isikwati esiwujuqu. Abadlali abangu-28 ababizwayo basuke befanelwe yindawo esikwatini,” kusho uBroos.