USihlalo weRichards Bay uJomo Biyela akanazo izinhlelo zokuxosha umqeqeshi uBrandon Truter ophikwa yimiphumela selokhu kuqale isizini.
UBiyela wabhoka ngolaka kuTruter sekuphele umdlalo weCarling Knockout ngempelasonto edlule. IBay yakhishwa kowesemifinal ibhekene neMagesi eKing Zwelithini Stadium.
Izinto azimhambeli kahle uTruter njengoba ezakhe zisashaye amagoli amabili kuphela emidlalweni elishumi uma kuhlanganiswa iBetway Premiership neCarling Knockout.
UBiyela uthi waphakanyelwa umoya esekhuluma noTruter. Uqhube waveza ukuthi akazimisele ngokumxosha.
“Kuyenzeka kuphakame imimoya ebholeni. Kuyenzeka uhluleke ukuzibamba, lokho akuchazi ukuthi sixabene nomqeqeshi. Ngikhuluma nje umqeqeshi umatasa neqembu eRichards Bay namuhla, useyingxenye yeqembu.
“Ngibonile kwabezindaba kubhalwe ukuthi umqeqeshi uxoshiwe, ngizokuqinisekisa ukuthi umqeqeshi usayingxenye yeqembu. Sizozama amaqhinga azosiza siqinise ezindaweni ezixegayo. Akusizi ngalutho ukushintsha abaqeqeshi,” kusho uTruter.
IBay ihleli ngesinqe esisodwa kunombolo 12 ngemuva kwemidlalo eyisikhombisa. IBay, enamaphuzu amahlanu, ingaphezulu ngamaphuzu amathathu kwiTS Galaxy edonsa amabhuleki emsileni.