Umdlali oyingxenye yesikwati seFrance esizodlala kuma-Olympics, uMichael Olise, uthi bekuyisifiso sakhe ukujoyina iqembu elikhulu njengeBayern Munich.
U-Olise ujoyine iBayern esuka kwiCrystal Palace, ashaye into ecokeme kuyo kumasizini amabili edlule. Ngesizini ka-2023/24 lo mdlali uvalele amagoli awu-10, washaya nama-assist ayisithupha. Ngeka-2022/23 ube nama-assist awu-11, okwenze amaqembu amaningi e-Europe aqala ukumbuka.
Kumaqembu abemfuna kubalwa iChelsea, Man United nePSG, kodwa ugcine eqoke ukuya eGermany.
“Izingxoxo neBayern zinginikeze ithemba. Ngijabule ngokudlalela iqembu elikhulu kanje,” kusho yena.
“Kuyinselelo enkulu, okuyinto ebengiyifuna. Ngifuna ukuziveza ezingeni eliphezulu, nginqobe izicoco.”
U-Olise, osayine inkontileka ephela ngo-2029, uzosebenza noVincent Kompany kwiBayern, odliwe yizembe neBurnley ngesizini edlule. Uhlalelwe wumsebenzi wokubuyisa isicoco seligi esinqotshwe yiBayer Leverkusen ngesizini edlule.