Umqeqeshi we-Inter Milan uSimone Inzaghi uthi uzokopela okwakwenziwa wu-Antonio Rudiger ku-Erling Haaland kumaqhinga akhe okumaka ibhunu laseNorway kowamanqamu weChampions League.
I-Inter Milan izobhekana neManchester City ngoMgqibelo ngo-9 ebusuku kumdlalo okulindeleke ukuthi ushube njengoba uqukethe iqembu elidume ngokuvala thaqa emuva nelinye eiludume ngokuhlasela.
Ekhuluma ngaphambi kwalo mdlalo u-Inzaghi uthe ukindele umdlalo onzima.
“Sizohlangana neqembu eliqine kunawo wonke emhlabeni ngoMgqibelo. Kodwa ke, sikhuluma ngomdlalo webhola, angisabi lutho.
“UGaurdiola uwumqeqeshi ophambili kunathi sonke. Siyamhlonipha kodwa siyazigqaja ngokudlala kowamanqamu, obekuyisifiso sethu. Kuzobe kuwumdlalo wokugcina emdlalweni ewu-57 esiyidlalile kule sizini.”
Ebuzwa ngomgadli osevalele amagoli awu-52 kule sizini, uHaaland, u-Inzaghi uthe iCity inabadlali abaningi abayingozi kodwa banawo amaqhinga abazowasebenzisa ukuzama ukumvimba.
“U-Antonio Rudiger wakwazi ukumvimba kahle kuma-semi final, nathi sizozama ukulandela indlela ayedlala ngayo.”