Ezindabeni ezithinta ukudayiswa nokuthengwa kwabadlali kuleli sonto siqala ngodaba lukaCristiano Ronaldo okuvela ukuthi uhlongoza ukubuyela e-Europe uma kuphela isizini.
URonaldo azimhambeli kahle izinto kwi-Al Nassr njengoba iqembu liqale ukubheda kulandela ukufika kwakhe. Usahlale izinyanga kuleli qembu uRonaldo kodwa ukuphikiwa yimphumela nokuchukuluzwa ngegama likaMessi emdlalweni agijima kuyo kungase kuholele ekutheni asheshe abuyele e-Europe.
Ngokombiko we-El Nacional iReal Madrid izimisele ngokumenza inxusa leqembu. Ngokwalo mbiko isinqandamathe sikaRonaldo, uGeorgina Rodriguez sizimisele ngokubuyela eSpain.
UTen Hag ufuna uKolo Muani
Kubikwa ukuthi umqeqeshi weMan United, u-Erik ten Hag uzimisele ngokusayinisa umgadli waseFrance uKolo Muani.
UMuani, odlalela i-Eintracht Franfurt eGermany uzobizwa imali ebalelwa ngaphezudlwana kuka £105 million, okusho ukuthi ushibhile kunoHarry Kane noVictor Osimhen.
Lo mgadli (24) unamagoli awu-13 nama-assist awu-10 emdlalweni ewu-28 kwiBundesliga.
IPSG izimisele ngoBernado Silva
Ngokombiko weFichajes, iPSG iyazethemba ukuthi ingamsayinisa umdlali weManchester City oke wafunwa yiBarcelona, uBernado Silva.
Sekunesikhathi nePSG imfuna lo mdlali kodwa iCity ibingezwa mshini ngaye. Kulokhu ngathi uPep Guardiola uzomvumela ukuthi ahambe uBernado, kodwa kuthiwa iCity izofuna imali engaphezulu kuka-€90 million.
UCarlo Ancelotti uthi ayimqumelanga ugwayi katiki iBrazil ngesokuqeqesha
Umqeqeshi weReal Madrid uCarlo Ancelotti uthi akekho osemthintile ngesikhundla sokuqeqesha iBrazil. U-Ancelotti useke waphumela obala ngesifiso sakhe sokuthatha lo msebenzi kulandela ukuxoshwa kukaTite. Njengamanje umsebenzi wokupheka iBrazil ubanjwe wuRamon Menezes.
Kunemibiko eveze ukuthi kumele kushaye uMay 25 u-Ancelotti esesayinile, okuyinto ayiphikayo lo mqeqeshi.
“Ayikho leyonto ngoba angikakhuluma namuntu. Sizobona kodwa. Ngijabule ngokuthi iBrazil ifuna ngizoqeqesha iqembu lesizini kodwa kumele ngihloniphe inkontileka enginayo neReal Madrid engifuna ukuyiqeda.”