Umqeqeshi we-Orlando Pirates uJose Riveiro uthi bahlele ukufinyelela kowamanqamu weMTN 8 njengoba beqhathwe neqembu elivikela indebe iMamelodi Sundowns.
Lamaqembu azotholana emidlalweni emibili, ezoqinisekisa iqembu eliya kowamanqamu.
“Kuzoshuba, kunesikhathi esilingana nenyanga sokulungiselela imidlalo yomibili. Kunzima ukuqagela ukuthi amaqembu azobe ekusiphi isimo ngaleso sikhathi.
Ngibheka ukululama kwabadlali nokuzethemba kwabo. Abalandeli bazowuthakasela kakhulu umdlalo, kuzobe kushubile. Womabili amaqembu anabadlali abaseqophelweni eliphezulu, kuzophakama imimoya.
Umdlalo womlenze wesibili uzocacisa kahle ngomphumela. Ngibona izoba nzima imidlalo, ngicabanga ukuthi amagoli azongena ngobuningi.
Sifuna ukudlulela kowamanqamu. Angeke ulindele iqembu elibuthaka uma usufinyelele kwi-semifinal. Siqhathwe neqembu elikhulu, sizozicija ukuze sizoba sezingeni kuleso sikhathi,” kubeka lomqeqeshi.