Umqeqeshi weStellenbosch FC uSteve Barker uthi banezinhlelo zokugcina izihlabani zeqembu ezifunwa eGauteng njengoba sekuvulwe iwindi lokuhwebelana ngabadlali.
IStellies idayise uJunior Mendieta, Ibrahim Jabaar, Vusi Sibiya, Olwethu Makhanya noSinethemba Mngomezulu ngaphambi kokuqala kwesizini ka-2023/24. USibongiseni Mthethwa wadayiswa isiqalile isizini.
IStellies ilahlekelwa uZitha Kwinika no-Ashley Du Preez abajoyina iKaizer Chiefs ngesizini ka-2022/23.
Labadlali babesize iqembu liqeda endaweni yesine neyesithupha kumasizini amabili adlule. Yize kunjalo, iStellies sibuye ngamandla kulesizini kwazise singoshampeni beCarling Knockout ngoDisemba.
“Akujwayelekile ukuthi iStellenbosch sibe nesikwati esiqinile njengoba kwenzeka kulesizini. Sasiphoqeleka ukusebenzisa uJayden (Adams), Devin (Titus), Antonio (Van Wyk) kubadlali abasuka ebhentshini kumasizini amabili adlule.
“Labadlali babeyizingane ngalesosikhathi, kwakunzima ukubathemba ukuthi bazoshintsha imidlalo ngoba isipiliyoni sasingabonwa. Ukubekezela nokubathemba kusizile ngoba sebeyakhombisa ukuthi bavuthiwe.
“Sisayine abadlali abasezingeni, lokho kuyangisiza uma ngifuna ukwenza izinguquko,” kuchaza uBarker engxoxweni nabeDiski Times.
UFawaz Basadien ukhonjwa kwiChiefs, ekubeni u-Adams ufunwa uthuli amaqembu aseGauteng.
“Ngifuna ukubumba isikwati esiqinile esinabadlali abasezingeni. Ngifuna sibagcine bonke abadlali, sisayinise ababili ngoJanuary. Kudingeka umdlali osezingeni, siqikelele ukuthi asilahlekelwa abadlali ewindini elilandelayo. Sizoba yiqembu eliqinile uma singenza lokho,” kuchaza uBarker.
IStellies siyibambe endaweni yesine kwiDSTV Premiership ngemuva kwemidlalo engu-15. EzikaBarker zisele ngamaphuzu angu-9 kwiMamelodi Sundowns ehleli esicongweni seligi.