Umqeqeshi weMamelodi Sundowns usekuchithile ukuthi ucasha ngesthupha uma eveza ukuthi abadlali bakhe bebekhathele emidlalweni emibili edlule abayidlalile.
IDowns ihluleke yancama ukushaya igoli ibhekene neCape Town City nePolokwane City.
Le miphumela iqede ngerekhodi leDowns lokuqoqa amaphuzu amathathu kuyona yonke imidlalo yeligi kulesizini. ISundowns ibisinqobe imidlalo engu-11 ilandelana.
AmaBrazilians asedlale imidlalo engu-30 kulesizini yize isashoda ngemibili kwiligi.
Abahlaziyi bebhola kumabonakude nasezinkundleni zokuxhumana abafunanga ukuyiqonda inkulumo kaRulani njengoba bemsola ngobuvaka uma egcizelela ukuthi abadlali bakhathele.
“Kukhona osolwazi abakholwa ukuthi iqembu alikhathele. Kulungile uma bebona kanjalo. Ngibonile uHugo Broos ethi abadlali beSundowns bafika ekhempini yeBafana bekhathele ngokwengqondo.
“Angikaze ngikhononde ngokugqilazeka kwabadlali nokusondelana kwemidlalo yethu. Abantu bangitshela ukuthi akumele ngivike ngesizathu semidlalo eminingi,” kubeka uRulani ekhuluma nabezindaba.
ISundowns iqhwakele esicongweni seligi njengoba ingakaze ihlulwe emidlalweni engu-13. AmaBrazilians aphinde anqoba isicoco se-African Football League ngo-Okthoba.
“UJay-Jay Okocha walincoma iqembu ngemuva komdlalo wamanqamu we-AFL. Ngisho umqeqeshi weMorocco wakhuluma kahle ngeBafana elekelelwa iningi labadlali beSundowns. Kusekhona abantu abasagxeka iqembu, belingabaza ngokwezinga,” kubeka uRulani.