Umqeqeshi weWydad Casablanca uWalid Regragui ufanise umphumela womdlalo wamanqamu weCAF Champions League nalowo we-UEFA Champions League onqotshwe yiReal Madrid eStade de France ngoMgqibelo.
URegragui uhole iWydad inqoba ngo 2-0 kwi-Ahly eStade Mohamed V ngeSonto ebusuku, yanqoba iChampions League ihlandla lesithathu emlandweni weqembu.
Lomdlalo ubuphelezelwa yizimlnkulumo ezingezinhle njengoba izikhulu nabalandeli be-Al Ahly bebekhala ngokusetshenziswa kwenkundla eseMorocco ukisingatha umdlalo wamanqamu.
“Kunzima ukushaya i-Al Ahly emdlalweni wamanqamu weCAF Champions League. Sikwenze konke enkundleni, bekufanele siwine. Ngiyajabula ngokuwina indebe yami yokuqala e-Afrika.
ICAF Champions League ilukhuni ukudlula iAFC Champions League yase-Asia ngoba ubhekana namaqembu amakhulu afana ne-Al Ahly, Raja Casablanca namanye. Namuhla besifana neReal Madrid, i-Ahly idlalise okweLiverpool. Sibayekile badlala ibhola kodwa besivale kahle emuva, sakuthola ebesikufuna.
Abadlali bazikhandlile enkundleni. Kuyabafanela ukunqoba lendebe. I-Al Ahly ifana neReal Madrid e-Afrika, Banolwazi lokunqoba imidlalo yamanqamu. Siwubukelile umdlalo wamanqamu we-UEFA Champions League, safunda ngamaphutha eLiverpool,” kubeka uRegragui.