Umqeqeshi weBarcelona uHansi Flick akakhathazekile ngeminyaka kaRobert Lewandowski (36) ovutha engabaselwe phambi kwepali kule sizini.
ULewandowski, ohlanganise iminyaka engu-36 maphakathi nesonto, ushaye igoli elinqobise iBarca ngo 2-1 ibhekene ne-Athletic Bilbao e-Olympic Stadium ngoMgqibelo. Usemanagoli amathathu emidlalweni emibili kwiLaLiga.
Lomgadli wavalela enethini amagoli amabili behlula iValencia emdlalweni wokuqala emasontweni amabili adlulile.
UFlick, owayecija lomgadli kwiBayern Munchen, uthi izinga likaLewandowski alehlile yize iminyaka isihambile.
“Ngisebenzile noLewandowski ngaphambilini, ungumqemane. Uyazikhandla uma singaliphethe ibhola, uyena owokuqala ofaka ingcindezi njengomgadli, yingakho ibhola siliwina engxenyeni yezitha. Sifuna ukudlala ibhola engxenyeni yezitha.
“URobert uyawuhlonipha umsebenzi, uyazinikela ejimini. Umzimba wakhe awufani neminyaka aseyihlanganisile. Uzolisiza kakhulu iqembu uma engumqemane. Uyakwazi ukubhakuzisa inethi noma engaphansi kwengcindezi,” kubeka uFlick.
ULewandowski ushaye ipali kabili emdlalweni, elinye ithuba lavinjwa unozinti u-Alex Padilla esiwombeni sesibili.
“Besilifuna igoli lesibili, uRobert ukwazile ukusebenzisa ithuba alitholile. Umsebenzi wakhe ukushaya amagoli, uneminyaka eminingi ebhakuzisa inethi. Bekufanele ashaye amagoli ambalwa esiwombeni sokuqala kodwa ngisazowubukela umdlalo.
“Ungumgadli onukelwa yigoli, unekhono lokushaya amagoli. Igoli lesibili lisiwinele umdlalo, sabuya namaphuzu amathathu,” kuchaza uFlick ecashunwa abezindaba.