Umqeqeshi weKaizer Chiefs uMolefi Ntseki uthi bazoqikelela ukuthi umdlali oyisethenjwa seqembu uKeagan Dolly akathunukali njengoba esebuyile ejimini.
UDolly ungene esiwombeni sesibili iChiefs ihlulwa yiCape Town City eFNB Stadium, okwaba umdlalo wokugcina sekuzoyiwa ekhefini leFIFA.
UDolly walimala edolweni ngesikhathi ezakhe zidlala neSekhukhune United kwiDSTV Premiership ngomhlaka 3 ku-Ephreli ngesizini ephelile.
Lomdlali waphuma ekhala izinyembezi enkundleni yize engadinganga ukukhishwa ngohlaka.
“UKeagan usehlale izinyanga ezinhlanu engalidlali ibhola ngenxa yokulimala idolo. Samdlalisa imizuzu engu-30 emdlalweni owedlule ukuze ezobamba umgqigqo aphinde ajwayele nendlela iqembu elidlala ngayo.
UDolly unethalente elimangazayo nesipiliyoni sakhe siphezulu. Uzobuya enkundleni uma esengumqemane kahle,” kubeka uNtseki.
IChiefs ilungiselela umdlalo weCarling Knockout naMaZulu ozodlalwa eFNB Stadium namuhla ntambama.
Amakhosi azoqala umdlalo enokuzethemba okuphezulu njengoba abhaxabula Usuthu ngo 3-0 kwiligi ngo-Agasti.