Babingelele iNkantolo yesifunda yaseModimolle abasolwa abathathu ababhekene necala lokweba imali engamadola aseMelika epulazini likaiPhala Phala, okungelaMengameli uMnuz Cyril Ramaphosa.
Abasolwa, u-Imanuwela David nezelamani uFroliana noNdilinasho Joseph, bathweswe uxhaxha lwamacala, okubalwa kuwo ukweba, ukushushumbisa imali, nokugqekeza ngenhloso yokweba
Abammangalelwa basolwa ngokweba imali engu-$580 000 amadola aseMelika eyayifihlwe ngaphansi kosofa. Lemali ibalelwa ku-R10 million wezigidi uma ibuyiswa eNingizimu Afrika.
Izelamani zakwaJoseph zingaphandle ngebheyili ka-R5000 no-R10 000 ngokuhlukana. Ummangalelwa osolwa ngokuba ungqondongqondo ekugqekezeni, wanqatshelwa ibheyili ngesizathu sokuthi angabaleka uma engadedelwa.
UFroliana wayeyisisebenzi epulazini ngesikhathi kugqekezwa kwebiwa imali. Kusolakala ukuthi abammangalelwa bakhanda itulo lokugqekeza ipulazi ngoFebruary 2020.
URamaphosa wachaza ukuthi u-$580 000 owebiwa kwakuyimali eyayikhokhwe usomabhizinisi waseSudan uHazim Mustafa owayezothenga izinkomo zohlobo lwe-Ankole.
Icala lihlehliselwe umhlaka 7 ku-Okthoba.