Uhlalelwe wumsebenzi wokusiza iBurnley ibuyele kwiPremier League owayengumgadli we-Orlando Pirates, uLyle Foster, osayine inkontileka yeminyaka emine nohhafu kuleli qembu.
UFoster ushiye iK.V.C Westerlo eyishayele amagoli awu-8 nama-assist amathathu emdlalweni ewu-21 kule sizini. Ukuthengwa kwakhe yiBurnely, ephekwa wuVincent Kompany, kujabulise abalandeli abaningi bebhola eNingizimu Afrika njengoba kungekho ngisho oyedwa umdlali wakuleli odlala kwiligi enkulu e-Europe.
IBurnley isesicongweni kwi-EFL Championship, ihamba phambili ngamaphuzu amahlanu. Amaqembu amabili aphezulu uma kuphela isizini akhuphukela kwiPremier League. Amaqembu okuphela isizini ekunombolo 3 kuya ku-6 adlala kuma-playoff ebanga isikhala sokugcina sokukhuphukela kwiPremier League.
Umdlali wokugcina wakuleli ogijime kwiPremier kube wuPercy Tau obesemabhukwini eBrighton & Hove ngaphambi kokujoyina i-Al Ahly. UTau ushiye eBelgium kade ecijwa wuKompany kwi-Anderlecht. UKompany uke wazama ukusayinisa uTebogo Mokoena kuyo i-Anderlecht, okubeka ngokusobala ukuthi unokubathanda abadlali baseNingizimu Afrika.
UForster uzofica iBurnley esidlala ibhola elihlukile kakhulu ngaphansi kukaKompany njengoba esethule indlela entsha yokudlala. Phambilini iBurnley ibidume njengeqembu elipaka ibhasi bese likushaya ngama long ball. Njengamanje leli qembu libeka phambii ipossession, okuyinto esebenzayo njengamanje njengoba lisadliwe kabili emdlalweni ewu-28.
Ukudlala kukaFoster kuleli zinga kuzomsiza akhule njengoba esaneminyaka ewu-22 futhi amathemba eBafana Bafana kubagadli abukeka esemahlombe akhe. IBafana sekuneminyaka idinga abagadli abadlala ezingeni eliphezulu abazolekelela iqembu kuma-qualifier e-AFCON naweWorld Cup.