AmaZulu FC asememezele ukuthi isinqanyuliwe inkontileka kaSibusiso Mabiliso, ojoyine esuka kwiKaizer Chiefs ngesizini edlule.
UMabiliso wayevele engumdlali woSuthu ngaphambi kokujoyina iChiefs kodwa wabuyela eThekwini kulandela ukucikwa ukukhuhliswa ibhentshi eNaturena.
Izinto azimhambelanga kahle eKZN njengoba edlale imidlalo emithathu kuphela ngesizini ka-2022/2023. Kule sizini ubesadlale imidlalo emibili kuphela njengoba ebanga isikimu nohlanya, uRiaan Hanamub, ofunwa uthuli eGauteng.
Ngokwesitatimende saMaZulu, iqembu nomdlali bavumelene ngokuhlukana.
“Siyabonga ngosenzele khona esingeke sikukhohlwe, sikufisela okuhle kodwa kuhambo lwakho olusha,” kusho Usuthu esitatimendeni.
UMabiliso ubeke kanje: ” Ngiyabonga kumengameli waMaZulu FC, kubaphathi, abaqeqeshi, ozakwethu kanye nabalandeli ngokungamukela ngezandla ezivulekile kuSuthu. Ngiyabonga ngakho konke. Ngilifisela okuhle iqembu kwimidlalo esele kule sizini.”