UHarry Maguire usethubeni lokubuya emdlalweni wePremier League phakathi kweManchester United neBrighton & Hove Albion ngoMgqibelo.

Lamazwi aqinsekiswe umqeqeshi weMan Utd uRalf Rangnick izolo. UMaguire wagcina ukudlala ngomhlaka 19 ku-Ephreli ezakhe zinenebulwa izimbangi ezinkulu iLiverpool ngo 4-0. Lokaputeni wabe esehlaliswa ebhentshini emdlalweni olandelayo beshaywa i-Arsenal ngo 3-1 kwiligi.

URangnick waveza ukuthi isimo uMaguire wayengaphathekile kahle ngemuva kokusatshiswa ngebhomu emini wakhe. Emdlalweni olandelayo, uMaguire wayelimele edolweni, waphoqeleka ukuba angabonwa bedlala ngokulingana neChelsea.

URangnick akafunanga ukucacisa ukuthi lomdlali uzowuqala yini umdlalo e-Amex Stadium.

“UHarry usebuyile ejimini, ubekhona kulelisonto. Uqale ukujima ngemuva komdlalo weBrentford. Uzobe ekhona esikwatini esizodlala neBrighton. Isinqumo sokumdlalisa ngizosenza uma sesiqedile ejimini. Angeke ngitshele izitha ngesikimu engizoqala ngaso, kodwa uMaguire uzobe ekhona.

U-Edinson Cavani useqalile ukujima, ungene esuka ebhentshini sibhekene neBrentford. URashford uzobe engekho, uyagula uphethwe umkhuhlane, nomzimba wakhe uyashisa. Angeke ahambe neqembu,” kuchaza lomqeqeshi.

I-United ihleli endaweni yesithupha kwiligi, isele ngamaphuzu amahlanu kwi-Arsenal ekunombolo 4.

UMaguire ugxekwa kakhulu ngokubhacaza kwe-United evuzayo emuva. Emidlalweni engu-35 esidlalwe uMaguire, leliqembu lisaqede imidlalo eyisikhombisa kuphela lingangenelwa yigoli.

I-United inerekhodi elihle uma idlala namaSeagulls njengoba isiyinqobe yonke imidlalo eyisikhombisa asebeyidlalile. Alikho iqembu asebelibhaxabule ukudlula iBrighton.