IMamelodi Sundowns ibuye namaphuzu aphelele kumdlalo weBetway Premiership obushubile eFNB Stadium ishaya iKaizer Chiefs ngo 2-1.
ISundowns ikhuphukele kunombolo 1 kulandela ukunqoba lo mdlalo obunezethameli ezingaphezulu kuka-80,000.
IChiefs iwuqale kahle lo mdlalo uRanga Chivaviro ekora ngomzuzu ka-9. Bekuyigoli lakhe lesibili emidlalweni emithathu kule sizini. Ngemuva kwegoli nokho umdlalo ushintshile iSundowns ingena egiyeni, idalela udonga lweChiefs izinkinga.
ISundowns ize yalinganise umdlalo ngegoli elihle elivalelwe wuLucas Ribeiro ngomzuzu ka-31, uliphakelwe wuTashreeq Matthews obeshaya i-assist yesine kule sizini. Ngemuva kwemizuzu eyisithupha umgadli omusha weDowns ofike wangena khaxa kuleli qembu, u-Iqraam Rayners ivalele igoli lesibili. Umqeqeshi weChiefs nabasizi bakhe, kanye nabadlali abebesebhentshini, bazwakalise ukungenami ngegoli lesibili leDowns obekubukeka liyi-offside.
ISundowns iqhubekile nokuphatha umdlalo esiwombeni sokuqala kwaze kwayiwa ekhefini kodwa umdlalo uthe ukushintsha kancane esiwombeni sesibili sekuphume uRibeiro noZwane, kwangena u-Aubrey Modiba noPeter Shalulile. NeChiefs yenze izinguquko, omunye wabadlali abangenile, u-Ashley Du Preez uthole ithuba elihle lokushaya igoli lesibili lesibili kodwa wavinjwa wuRonwen Williams.
Lo nozinti uphinde wageza ibhola likaCastillo ebelibheke enetheni ngomzuzu ka-81.
IChiefs neSundowns bazohlala amasonto amane bengadlali njengoba kuyiwa ekhefini leFIFA. Izobhekana neSuperSport ngo-October 26. ISundowns izobhekana nePolokwane City ngo-October 27.