ISpain ingompetha be-Euro 2024 kulandela ukushaya i-England ngo 2-1 kowamanqamu e-Olympiastadion eBerlin ngeSonto ebusuku. Bekungokwesibili kulandelana iThree Lions idliwa kowamanqamu njengoba yashaywa yi-Italy kweyango-2020.
ISpain inqobe ngegoli likaMikel Oyarzabalelingene esiwombeni sesibili ngomzuzu ka-86.
Leli qembu libuye ekhefini livutha, kucaca ukuthi selikhuphule igiya lashintsha izinto, lakora kuqala ngomzuzu ka-47 (Nico Williams).
Abadlali basophondweni uLamine Yamal noWilliams abebevaliwe esiwombeni sokuqala bebekhululekile esiwombeni sesibili ngokunjalo nabadlali basesiswini beSpain.
Igoli liphoqe uGareth Southgate ukuthi ashintshe izinto. Ngomzuzu ka-61 ukhiphe ukapteni uHarry Kane wafaka umgadli we-Aston Villa u-Ollie Watkins. Uphinde washintsha ngomzuzu ka-70 ekhipha efaka uCole Palmer esikhaleni sikaKobbie Mainoo.
Kuthe kungakapheli ngisho imizuzu emithathu uPalmer uvalele elihle igoli ngemuva kwebhola elibuyiswe wumdlali weReal Madrid uJude Bellingham.
Umoya womdlalo uvele washintsha ngemuva kwegoli likaPalmer, amaNgisi abukeke esevuke emaqandeni. Nokho kuthe sekushaya umzuzu ka-80 yaqala yabuyisa ingcindezi iSpain, ibisingqongqoza okuphethe ngegoli elivalelwe wuMikel Oyarzabal ngomzuzu ka-86.
Bekungokwesine emlandweni iSpain inqoba i-Euro. UYamal uqophe umlando naye eba ngumdlali omncane kunabo bonke emlandweni ukunqoba lo mqhudelwano.