Isenzo seMamelodi Sundowns sokuphuca uManqoba Mngqithi isikhundla sokuba ngumqeqeshi omkhulu weqembu singase siyifakele ingcindezi iKaizer Chiefs okungayihambeli kahle kule sizini.
ISundowns ithatha lesi sinqumo nje iqhwakele kwiligi yeDStv Premiership kulandela ukunqoba imdlalo emine edlule ilandelana. Ukushaywa kwayo ngo 3-0 kodwa kubaphoxile abaphathi beqembu njengoba bekukhona ngisho umengameli weqembu ngesikhathi ixetshulwa ePeter Mokaba.
Nakuba iChiefs ingakhishwanga ngo 3-0 kwiMTN8, imphumela emasontweni edlule ayigculisi, ikakhulukazi njengoba iyeke ithuba lokuzisondeza neqembu elisesicongweni kwiDStv Premiership ngesonto eledlule.
IKaizer Chiefs ibheke kwiSoweto Derby kule mpelasonto, izobhekana ne-Orlando Pirates esefomini ngoMgqibelo ngo-15:30 ntambama. Uma iqembu eliphekwa u-Arthur Zwane lihluleka ukubuya nomphumela ozogculisa abalandeli kulo mdlalo kungenzeka kube nezinguquko kubaqeqeshi. IChiefs isanqoba imidlalo emhlanu emdlalweni ewu-12 kule sizini.
Kusangenzeka kodwa anikezwe eminye imdlalo yokulungisa izinto uZwane njengoba nangesizini edlule uStuart Baxter uze wakhonjwa indlela esedlalise imdlalo ewu-23 kwiDStv Premiership. Kungenzeka noZwane okungenani anikezwe imdlalo ewu-20 kwiligi ngaphambi kokuthi abaphathi bathathe isinqumo uma iqembu liqhubeka nokubhacaza.