Inhlangano ephethe ibhola kuleli, iSouth African Football Association, isizwakalise ukungena ngokufuqwa ngemidlalo yeCOSAFA minyaka yonke.
ICOSAFA nakulonyaka ihlela ukusingatha imiqhudelwano yayo kuleli njengoba ihlela ukusebenzisa isifundazwe iFree State. Ngo-2023 kade iCOSAFA idlalelwe eThekwini.
ISAFA isiqale ukubuza omakhelwane ebambisene nabo kwiCOSAFA ukuthi kanti bona bayisingatha nini.
“Sibhekene nobunzima kwiCOSAFA ngoba ivele iziyele kwiminyango kahulumeni. Sithuke kabi sibona iFree State ithi izosingathi lo mqhudelwano. Sibhalele iCOSAFA siyazisa ukuthi kumele sifake isicelo ukuze sisingathe umqhudelwano. INingizimu Afrika ayizifaki izicelo zokusingathi lo mqhudelwano kodwa yenzeka kuleli,” kusho iCEO y-SAFA u-Adv Tebogo Motlanthe ecashunwa yiSABC Sport.
“Sesitshele iCOSAFA ukuthi iphula imithetho yayo. Lokhu kusibuyisela emuva ngoba sakubeka kwacaca ukuthi sifuna ukugxila ekusingatheni iFIFA Women’s World Cup yango-2027…kunabanye asebezothi ‘asiyingeni ngoba sichithe imali kwiCOSAFA’. Sizama ukugwema leso simo.
“Sizoba nomhlangano neCOSAFA siyikhumbuze ukuthi awu-14 amazwe abambisene kwiCOSAFA, kodwa konke kwenzelwa eNingizimu Afrika ngisho singazifakile izicelo.