USihlalo weSAFA eKZN uthi bazozisola ngelinye ilanga abalandeli boMsinga United abasuse uthuthuva kulandela ukushaywa kwezabo emdlalweni ne-Orbit College kuma-semifinal eSAFA ABC Motsepe League National Play-offs eHarry Gwala Stadium ngoLwesihlanu ntambama.
Kube ncane indawo ngemuva kwalo mdlalo izolo kulandela ukushaywa kweMsinga United ngo 1-0 okucasule abalandeli bayo abajikijele amabhodlela nezigubhu zamanzi enkundleni bekhala ngezinqumo zikanompempe, uMasixole Bambiso, ophume esegadwe ngamaphoyisa. Kuphinde kwaqhuma nenganono kuyo le nkundla, okuthuse abaningi.
The situation could’ve been worse at Harry Gwala stadium 🏟️…this was the private security team member who was beaten on the stands by UMsinga United supporters. And was later involved in the gunfire with the same supporters. @SABC_Sport | #sabcnews pic.twitter.com/DXB9rXigvu
— Velile Mnyandu 🇿🇦 (@Velile_Mnyandu) June 10, 2023
Usihlalo weSafa KwaZulu-Natal, uKwenzakwakhe Ngwenya, utshele abezindaba ngemuva komdlalo ukuthi abaphathi boMsinga bazohlawuliswa ngesenzo sabalandeli bayo, waveza nokuthi bazoqinisa ezokuphepha kowamanqamu ophakathi kwe-Upington City ne-Orbit College ngeSonto.
“Siphoxekile kakhulu ngalesi sigameko, noma besibafisela ukuthi banqobe. Besifuna banqobele isifundazwe, kodwa asiyithandanga neze indlela abalandeli abaziphathe ngayo…basazozisola ngalento nabo.
“Sizoqinisa ezokuphepha ngokuzayo. Kowamanqamu sizokuqinesekisa lokho.”