IPSG iphinde yaphuma ishwiba izandla kwi-UEFA Champions League ibhaxabulwa yiBayern Munich ngo 2-0 (agg 3-0) emlenzeni wesibili kowe-round of 16 izolo e-Allianz Arena.
Amagoli eBayern Munich avalelwe wu-Maxim Choupo-Moting noSerge Gnabry esiwombeni sesibili.
Ukudliwa kwePSG kuzophakamisa imibuzo ngesinqumo sokunikeza uKylian Mbappe inkontileka eyamvumela ukuthi abe nombon ngabadlali abasayiniswe yileli qembu ngokunjalo nokuqashwa komqeqeshi kulandela ukuxoshwa kukaMauricio Pochettino. Nangesizini edlule iPSG yaphuma kwi-round of 16 kwi-UCL.
Ekhuluma ngemuva komdlalo umqeqeshi wePSG uChristophe Galtier uvike ngokushodelwa abadlali abalimele.
“Inkinga ayikho kwisikwati esinaso, inkinga ukuthi bekunenqwaba yabadlali abangakwazanga ukudlala ngenxa yokulimala. Lokhu kusithambisile emdlalweni emibili edlule,” usho kanje.
Emlenzeni wokuqala uMbappe wangena esuka ebhentshini emlenzeni wokuqala. Izolo iPSG ibishoda ngoNeymar noPresenl Kimpembe.
“Sesidlale imidlalo emningi kule sizini, bekuneWorld Cup…bekungaba ngcono ukube sifike kwi-last 16 bekhona bonke abadlali.”
Ekhuluma ngemuva komdlalo uMbappe uthe benze konke okusemandleni ukuqhubekela phambili kwi-UCL kwangalunga.