I-Orlando Pirates isiqinisekise izindaba zokudedela umgadli ofike washaya udaka uBienvenu Eva Nga nokuthi isisayinise abadlali ababili abasha, yabuyisa noTshegofatsha Mabasa kwi-loan.
Lo mgadli ushiya iBucs eyishayele igoli elilodwa emdlalweni ewu-15. Ukuhamba kwakhe kuvule isikhala sokubuyisa uMabasa osevalele amagoli ayisithupha kule sizini kwiMoroka Swallows enenkinga yezimali kulezi nsuku.
IBucs iqinise isikwati ngoThabiso Lebitso obegijima kwiChippa United. Usayine inkontileka yeminyaka emibili nezinyanga eziyisithupha. Ekhuluma ngokujoyina iPirates, uLebitso (28) ubeke kanje: “Ukujoyina i-Orlando Pirates kuyisigaba esikhulu empilweni yami, sengijahe ukuba nesandle empumelelweni yeqembu.”
IPirates ilande noThalente Mbatha (23) kwiSuperSport United obelizwa ngendaba ijezi ePitoli. UMbatha aksayinisiwe ngokuphelele, okwamanje usabolekiwe kodwa iPirates ingakwazi ukumgcina uma kuphela isizini ngokwesivumelwano enaso neSuperSport.