Umdlali weMamelodi Sundowns uMusa Lebusa uthi abayithathi njengezimbangi ezinkulu i-Orlando Pirates yize ibaxebule emidlalweni emibili yamanqamu ngesizini ka-2023/24.
ULebusa ubona iDowns iyishiya kude iBucs uma sekukhulunywa ngokuqina kukakhakhayi nangezinhloso zokushanela izindebe.
ISundowns iphinde yakhonya ngesizini ephelile iqopha umlando wokunqoba iDStv Premiership ihlandla lesikhombisa kulandelana. AmaBrazilians aqukule nesicoco se-African Football League (AFL) ebesidlalelwa okokuqala ngqa ngesizini edlule.
IBucs ilale endaweni yesibili kwiligi, okube yisizini yesibili ilandelana. Iphinde yaqukula iMTN 8 neNedbank Cup ishaya iSundowns kowamanqamu kuyona yomibili imiqhudelwano.
Yize kunjalo, uLebusa uthi iSea Robbers kusafanele isebenze kanzima uma ifuna ukubangisana neSundowns.
“Sekuphele amasizini amaningi kukhulunywa ngokujaha iSundowns, namanie bayahluleka. Iqembu labo lihlangene manje (Pirates) kodwa izinga labo alikasondeli kwelethu. Kuqine ukhakhayi kwiSundowns, silwela ukunqoba izinto ezibalulekile.
“Silindele ukubona abazokwenza. Silwela ukwenza kangcono kunakuqala. Siyazikhandla ukuze sizoba ngcono uma siqhathanisa nesizini ephelile,” kubeka uLebusa engxoxweni nabeDiski Times.