Ujabulise okwengane umqeqeshi weLiverpool uJurgen Klopp ezakhe zishaya i-Everton ngo 2-0 kwiMerseyside Derby izolo ebusuku kowePremier League.
ILiverpool ikhuphukele kunombolo 9 ngalo mphumela, isasele ngamaphuzu awu-9 kwiNewcastle United ekunombolo 4 kodwa inomdlalo esandleni. Kulo mdlalo uMoh Salah uvalele igoli lokuqala ngomzuzu ka-36, elesibili lakorwa wuCody Gakpo, obekora okokuqala kwiPremier League selokhe ejoyine iLiverpool.
Okujabulise uKlopp wukuthi iqembu lakhe libukeke libuyela kwizinga langesizini edlule, nabadlali abasha babuka bengena egiyeni.
“Ngizizwa ngikhululekile. Iwona muzwa ongifikele kuphela umdlalo. Ngijabule ngendlela esidlale ngayo. Emhlanganweni ngaphambi komdlalo ngitshele abadlali ukuthi siwulungiselele kahle umdlalo, sengifuna ukubabona enkundleni.
“Besiwudinga lo mdlalo, nokudlala ngendlela esidlale ngayo. Kubajabulisile abalandeli bethu ukusibona sidlala ngale ndlela. Ubuzibonela injabulo yabo singakashayi negoli lokuqala.
Ngiwathandandile amagoli esiwavalelile namhlanje, ngiyithandile indlela esiwakhe ngayo nendlela iqembu ebelinyakaza ngayo enkundleni.”
ILiverpool izobhekana neNewcastle ngoMgqibelo ngo 19:30 ntambama.