Umqeqeshi weMamelodi Sundowns uMiguel Cardoso ushayele abadlali bakhe ihlombe ngendlela abadlale ngayo ukuze bafinyelele kowamanqamu weCAF Champions League.
ISundowns izolo ishaye i-ES Tunis ngo 1-0 (agg 2-0) emlenzeni wesibili wesemifinal, yazibekisela indawo kowamanqamu. Izobhekana ne-AS FAR yaseMorocco.
Okwesibili kulandelana uCardoso efaka iDowns kowamanqamu njengoba akwenza nangesizini edlule bashaywa yiPyramids.
“Namhlanje umdlalo unqunywe yipenalty kodwa bekusifanele ukunqoba umdlalo. Sidlale ibhola elisezingeni eliphezulu namhlanje. Imidlalo yeChampions League kufanele idlalwe kanje,” kusho uCardoso ngemuva komdlalo.
“Kunezikhathi la okufanele uvale khona emuva, kodwa akufanele ukhohlwe ukuthi kunegoli phamboli elingakunikeza ithuba lokulawula umdlalo.
“Ngijabule kakhulu ukuthi sengifake leli qembu kowamanqamu okwesibili. Ngiyaziqhenya ngabadlali bami, ngiyaziqhenya ngeDowns.”