Umqeqeshi weCape Town City u-Eric Tinkler uthi kwehle umthwalo emahlombe akhe ngemuva kokuthola iphuzu lokuqala kwiDSTV Premiership kulesizini bedlala ngokulingana neMaritzburg United e-Athlone Stadium ngoLwesibili.
ICity ibishaywe kuyona yomithathu imidlalo yeligi ngaphambi kokutholana neTeam of Choice.
Yize engawatholanga amaphuzu agcwele ekhaya, uTinkler uthe ujabule ngokuzimisela kwabadlali, usethemba ukuthi bazonyusa amasokisi uma sebedlala neStellenbosch kowomkhaya ngoMgqibelo.
“Bengijabule ngokuzimisela kweqembu lami. Bekunzima ukuzodlala njengoba besihlulwe emidlalweni emithathu eyedlule. Bekunzima kakhulu nemiphumela ibibheda. Sadlala kahle sibhekene neSundowns (Mamelodi) yize sasihluleka ukuqala ibhola emuva.
Lelophutha sililungisile emdlalweni weSwallows, sadlala kangcono uma siqala ibhola emuva. Sikhande amathuba angcono, yize singakwazanga ukunqoba.
Kwenzeke into efanayo sibhekene naMaZulu. Ngibona sengathi ukubhimba kwemiphumela kuphazamise abadlali nabaqeqeshi emqondweni,” kubeka uTinkler kwabezindaba.
ICity isabambe amabhuleki kwiligi njengoba inephuzu elilodwa ngemuva kwemidlalo emine. UTinkler uthi sekuseduze ukuthi banqobe.
“Bekubalulekile ukuthi sithole umphumela ogculisayo, kunokuthi sidlale ibhola elihle. Ngibone ibhola elihle, besifuna ebhokisini, besiyingozi uma sishoshela phambili.
Ukungangenelwa yigoli kuyangikhuthaza yize besifuna ukunqoba ngenkani. Ngibona sihamba ngendlela elungile, akufani nokuthi sidlala ibhola elibhedayo. Inhlanhla izosivuna nathi, ngiyakholelwa kulokho,” kubeka lomqeqeshi.