IReal Madrid isimnikeze izibusiso uCasemiro mayelana nokujoyina iManchester United ezimisele ngokukhokha imali engaphezulu kuka-60 million wopondo baseBritain.
Izingxoxo seziqalile phakathi kwamaqembu, kanti ne-United isithole isiqinisekiso sokuthi uCasemiro uyafuna ukuyijoyina.
UCasemiro (30) unobudlelwano obuhle nomqeqeshi uCarlo Ancelotti.
Ukusayiniswa kuka-Aurelien Tchouameni sekushubise umbango wejezi esiswini seMardrid, okuyisizathu esenza uCasemiro afune ukushiya eqenjini.
Kuvela ukuthi u-Ancelotti akamboni uCasemiro ezodlala isikimu kalula eqenjini njengoba sekusayine abadlali abasha esiswini.
ULuka Modric welule inkontileka ngonyaka owodwa, kanti noToni Kroos uyisisekelo esiqinile enkabeni yesisu kwiLos Blancos. Kusekhona u-Eduardo Camavinga, Tchouameni noFederico Valverde.
IMadrid ibona kunzima ukuqinisekisa ukuthi uCasemiro uzozidlela ijezi kalula. Icabanga ukumdayisa ngemali enkulu, iphinde inciphise nengcindezi esikhwameni samaholo eqenjini.
I-United iqale ngokuzama ukusayinisa uFrenkie De Jong kodwa umdlali wayichitha izikhathi eziningi. Imataniswa noMoises Caicedo weBrighton & Hove Albion kodwa akukho osekukhulunyiwe.
UCasemiro ucabanga ukushiya kwiMadrid njengoba ekhalela isikimu kwazise neNdebe yoMhlaba isisondele.
IMadrid ithi isinqumo esiwujuqu silele kuye uCasemiro, yona inabo abadlali ezoqhubekela phambili nabo.
UCasemiro unemidlalo engaphezulu kuka-300 eSantiago Bernabeu, kanti ubeyingxenye yamaqembu amahlanu anqoba i-UEFA Champions League.